முஸ்லிம்கள் தாடி வைப்பது ஏன்?

முஸ்லிம்களில் பலரும் தாடி வைத்திருப்பதைப் பார்த்திருப்பீர்கள். அவர்களுள் சிலர் தாடிக்கு கலரிங் செய்திருப்பதையும் பார்த்திருப்பீர்கள். அவர்களது வேறு சில நடைமுறைகளையும் பார்த்து, எதற்கு என வினவியிருப்பீர்கள்? தாடி சம்பந்தமான ஹதீஸ் ஒன்றினைதான் இப்பதிவில் பார்க்கப்போகின்றோம்.

ஹதீஸ் என்றவுடனே அலறி, "அய்யயோ! ஹதீஸா? இது பலமான ஹதீஸா? பலவீனமான ஹதீஸா?" என்றெல்லாம் நீங்கள் கேட்பீர்கள் என்று தெரியும். அதனால்தான், இன்றைய தமிழக முஸ்லிம்களின் அவுலியாக்களில் ஒருவரான பீஜேயின் தளத்தில் கொடுக்கப்பட்டுள்ள ஹதீஸை இங்கே பதிப்பித்துள்ளோம். ஹதீஸின் நம்பகத்தன்மை குறித்து உங்களுக்கு ஐயம் இருந்தால், பீஜேயின் தளத்தில் கேளுங்கள். பதில் கிடைக்கக்கூடும்.

இந்த ஹதீஸ் இடம்பெற்றுள்ள பீஜேயின் பக்கத்திற்கான சுட்டி. குறிப்பிட்டுள்ள வலைப்பக்கத்தில் இருக்கும் ஹதீஸ் இங்கேயும்.

• அபூ உமாமா (ரலி) அவர்கள் கூறுகிறார்கள்:
• அல்லாஹ்வின் தூதர் (ஸல்) அவர்கள் முதிர்ந்த வயதுடைய அன்சாரிகள் சிலரைக் கடந்து சென்றார்கள். அவர்களின் தாடிகள் வெண்மையாக இருந்தன. அப்போது நபி (ஸல்) அவர்கள் அன்சாரிக் கூட்டத்தாரே (உங்கள் தாடிகளை) சிவப்பு நிறத்தில் அல்லது மஞ்சள் நிறத்தில் வைத்துக் கொள்ளுங்கள். வேதமுடையவர்களுக்கு மாறு செய்யுங்கள் என்று கூறினார்கள். அல்லாஹ்வின் தூதரே வேதமுடையவர்கள் முழுக்கால் சட்டை அணிகிறார்கள். வேட்டி அணிவதில்லை என்று நான் கூறினேன். அதற்கு அல்லாஹ்வின் தூதர் (ஸல்) அவர்கள் நீங்கள் முழுக்கால் சட்டையும் வேட்டியும் அணியுங்கள். வேதமுடையவர்களுக்கு மாறு செய்யுங்கள் என்று கூறினார்கள். அல்லாஹ்வின் தூதரே வேதமுடையவர்கள் காலுறை அணிகிறார்கள். காலணி அணிவதில்லை என்று நான் கூறினேன். அதற்கு நபி (ஸல்) அவர்கள் நீங்கள் காலுறையும் காலணியும் அணியுங்கள். வேதமுடையவர்களுக்கு மாறு செய்யுங்கள் என்று கூறினார்கள். அல்லாஹ்வின் தூதரே வேதமுடையவர்கள் தங்களது தாடிகளை (ஒட்ட) கத்தரித்துக் கொள்கிறார்கள் மீசையை வளர விடுகிறார்கள் என்று நாங்கள் கூறினோம். அதற்கு நபி (ஸல்) அவர்கள் உங்களது மீசைகளை நீங்கள் (ஒட்ட) கத்தரியுங்கள். தாடிகளை வளர விடுங்கள். வேதமுடையவர்களுக்கு மாறு செய்யுங்கள் என்று கூறினார்கள்
• நூல் : அஹ்மது 21252

வலைப்பக்கத்தின் ஸ்க்ரீன் ஷாட் இங்கே.

இவ்வளவும் படித்துவிட்டு கீழே இருக்கும் படத்திலிருப்பவர் ஏன் தாடிக்கு கலர் அடித்திருக்கிறார் என்று கேட்டால் அதற்கு கம்பெனி பொறுப்பாகாது.

பிறை பார்த்தல், தாடி வைத்தல், குறிப்பிட்ட வகை உடை அணிதல் என்பவையெல்லாம் குறிப்பிட்ட நிலப்பகுதியில் வாழ்ந்த மக்களுக்காக, யூத கிருத்துவ நடைமுறைகளுக்கு மாற்றமாக கொண்டுவரப்பட்டவை என்றுதான் இவ்வகை ஹதீஸ்கள் கூறுகின்றன. இஸ்லாமிய நடைமுறைகள் அல்லாஹ்வால் முன்மொழியப்பட்டவையா? அல்லது யூத, கிருத்துவ நடைமுறைகளுக்கு மாற்றமாகக் கொண்டு வரப்பட்டவையா?

சிந்திக்கத் தெரிந்தவர்களுக்கு பல சான்றுகள் உள்ளன. எங்கேயோ படிச்ச மாதிரி இருக்கா? ஹி ஹி ...

டிஸ்கி: நான் தற்பொழுது வைத்திருக்கும் தாடிக்கும் இந்த ஹதீஸுக்கும் எவ்விதத் தொடர்புமில்லை என்பதை எனது தாடி மீது சத்தியம் செய்து தெரிவித்துக் கொள்கின்றேன்.