பிரபல வலைப் பதிவர்களிடம் ஒரு பகிரங்க மன்னிப்பு !

கடந்த சில நாட்களாக (சில என்ன பல நாட்களாகவே ) வலையுலகில் ஜோதிட மற்றும் கடவுள் நம்பிக்கை சார்ந்த பதிவுகளில் வலியச் சென்று வாயிழுப்பதும், இது போன்ற கடவுள் , ஜோதிடம் போன்ற நம்பிக்கைகளுக்கெதிராக பதிவுகளிடுவதும் , அவற்றிற்கு ஏராளமான பின் மொழிகளும் அதனூடே வாக்குவாதங்களும் வலுப் பெறுவது தொடர்கின்றது.
குறிப்பாக ஆர் வீ சுப்பையா வாத்தியாரின் வலைத் தளங்களில் நமக்கும் அவர்தம் சிஷ்ய கோடிகளுக்கும் இடையிலான விவாதங்களினூடே மூட நம்பிக்கைகள் குறித்தான வினாக்களை எதிர்கொள்ள கையாலாகாமல் மேற்படி பக்த கோடிகளால் விவாதம் வேறு வகையில் திசைமாறவும் உணர்ச்சி மிகுதியில் அவரது ரசிகர்களை நாமும் சற்று எள்ளல் நடையில் சாடியதும் உண்மை .
அஃதன்றி வேறு சில தளங்களிலும் இதனையொத்த சம்பாஷனைகள் பின்னூட்டங்களில் பொறி பறக்க நடந்தேறிக்கொண்டு இருக்கின்றன.
முதலில் நமக்கும் மேற்காண் ஜோதிட பதிவர்களுக்கும் யாதொரு முன்விரோதாமோ காழ்ப்புணர்ச்சியோ துளியும் கிடையாது ;
இருவேறு நம்பிக்கைகளிடையே இது போன்ற கருத்து மோதல்களில் "பிடிக்காவிடில் ஒதுங்கிக் கொள்வது தானே " எனும் கருத்தின் சாரம் வாத்தியாரின் ரசிகர் தரப்பினின்று வலித் தொலிக்கக் கேட்கிறோம் ;
பிளாகர் போன்ற சமூக வலை தளங்களில் பின்மொழிகளையும் விவாதங்களையும் உத்தேசித்தே கருத்துக்கள் பதிவேற்றப் படுகின்றன . ஆயின் எவரையும் தடுக்கவோ ஒதுக்கவோ பிரியமெனில் ஆகச் சிறந்த முயற்சியில் அங்ஙனம் பிரியம் கொண்ட நபரே ஈடுபடட்டும் , நாம் நுழைவதிலுள்ள நியாயம் குறித்து வினாக்கள் எழுப்புவதில் எந்த பிரயோஜனமும் உள்ளதாகப் படுவதில்லை

அது மட்டுமன்றி வெறும் கும்மி கொட்டுவதற்காக இது போன்ற செயலில் ஈடுபடுவதாகக் கொண்டால் எதற்க்காக உம்மை தெரிவு செய்ய வேண்டும் - நீர் ஊரை ஏமாற்றுவதாகப் படுகிறது - இது எமது ஆழ்ந்த நம்பிக்கை .
அதற்காகவே பின்மொழியிடுகிறோம்
ஆயிரம் பிறை கண்ட அபூர்வ ஜோதிடர்களும் மற்றோரும் பின்னூட்டங்களை மட்டுருத்துவதன் மூலமும் ,அழிப்பதன் மூலமும் உமது முகமூடிக்கு மேல் போர்வை போர்வை போர்த்துவதில் ஒருவகையில் எமக்கு மகிழ்ச்சியே !

இங்ஙனம் ஊரை ஏமாற்றும் வேலையை நீவிர் தெரிந்தே செய்யும் பட்சத்தில் போர்வைஎன்ன பொட்டிக்குள் வேண்டுமானாலும் போய் படுத்துக் கொண்டு தங்கள் திருப் பணியை தொடரலாம் .

அவ்வாறன்றி எதிர் கருத்துகளிருப்பின் மட்டுருத்தல்களை நீக்கி பொதுவான விவாதத்திற்கு வரட்டும்
பதிலளிக்க முயற்சிக்கட்டும்

எதற்க்காக இல்லாவிடிலும் தொடரும் அந்த ஆயிரத்திச் சொச்சம் சிஷ்யர்களின் நாளது வரையிலான நம்பிக்கையினை காப்பாற்றும் நிமித்தமாவது

போர்வை திறமின்
முகமூடி துறமின்

இதுகாறும் சுப்பையா வாத்தியார் மற்றும் இன்னபிற வலை தளங்களில் அவர்தம் நம்ம்பிக்கைக் கெதிராய் கருத்துகளிட்டமைக் காக இப்பதிவின் வழி மன்னிப்புக் கோருகிறேன் ...

இது போன்ற எமது வேலைகள் இனியும் தொய்வின்றி தொடரும் ; மாதமொருமுறை மன்னிப்பும் கோரப்படும் ....